A Xunta de Galicia volve poñer en marcha o programa Benestar en Balnearios. Un programa para persoas maiores de 60 anos de Galicia, pensado para seguir gañando en saúde e calidade de vida, a través do descanso e dos beneficios das augas termais.
En que consiste?
Estadías de 10 días e 9 noites en réxime de pensión completa -inclúe aloxamento, almorzo, xantar e cea- a escoller entre 15 balnearios de Galicia, con quendas dispoñibles entre xullo e decembro de 2026.
O programa inclúe os tratamentos termais prescritos polo persoal médico do balneario, así como as actividades de animación sociocultural de cada establecemento.
A quen vai dirixido?
O programa está dirixido a persoas maiores de 60 anos residentes en Galicia, así como a persoas pensionistas maiores de 55 anos. Pódese asistir cun acompañante.
Ademais, no caso de ter un fillo ou filla cun grao de discapacidade igual ou superior ao 33 %, este tamén pode participar.
As persoas participantes deben valerse por si mesmas para realizar as actividades básicas da vida diaria.
Cal é o prazo de solicitude?
Do 27 de maio ao 26 de xuño de 2026, ambos incluídos.
Como se solicita?
- Preferentemente a través da sede electrónica da Xunta de Galicia (procedemento BS607A)
- Presencialmente nas oficinas de atención á cidadanía e de rexistro da Xunta, ou nas oficinas de Correos presentando o impreso de solicitude que se atopa ao final desta páxina.
Canto custa?
As tarifas están subvencionadas pola Xunta de Galicia, polo que o programa ofrece prezos reducidos que oscilan entre os 31 e os 44 euros por noite, segundo o establecemento escollido.
Os prezos de cada establecemento pódense consultar no folleto informativo.
Como confirmo a reserva?
Cando reciba a confirmación da concesión da praza, debe contactar co balneario para reservar a quenda a través dun depósito de 30 euros. O restante aboarase á chegada.
Para maior información e trámite de solicitudes, acudir ao departamento de servizos sociais do Concello de Rodeiro.
